E kishte premtuar përpara fushatës, por edhe pas fitoi zgjedhjet parlamentare të 6 tetorit se, kur të hynte në zyrën e Kryeministrit do të mbante aty edhe flamurin shqiptar. Por Albin Kurti nuk e ka mbajtur premtimin në ditën e parë të punës si kryeministër i Kosovës.
Ai ka pritur sot në takim ambasadorin e SHBA-së në Prishtinë, Philip S. Kosnett, si dhe ambasadorin e Shqipërisë, Qemal Minxhozin. Në fotot e shpërndara nga zyra e shtypit të Qeverisë, flamuri shqiptar nuk duket asgjëkundi në zyrën e Kurtit. Flamuri kuq e zi shfaqet vetëm kur në takim hyn ambasadori Minxhozi, i cili normalisht përfaqësohet me atë flamur. Por kur në zyrë ishte ambasadori amerikan, shihen vetëm flamujt e Kosovës dhe të SHBA-së.
Albin Kurti kishte premtuar se flamuri kuq e zi do të qëndronte në krah të flamurit të Kosovës, por deri më tani nuk ka ndodhur kështu. Pasi fitoi zgjedhjet, Kurti i priti ambasadorët në selinë e Vetëvendosjes vetëm me flamurin kuq e zi dhe jo atë të Kosovës, duke shkaktuar reagime edhe në Beograd. Por një veprim të ngjashëm nuk e ka përsëritur tani që ka hyrë në zyrën e kreut të ekzekutivit.
E ka ftuar Rama? Kurti konfirmon: Vizita e parë si kryeministër në Shqipëri
