Pediatria po përballet ditët e fundit me një fluks të pazakontë urgjencash, kryesisht me simptoma gripale. Ky fluks shkon deri në 440 raste në 48 orë.
Dyndja e pacientëve në Urgjencën Pediatrike në QSUT cilësohet një problem shumë serioz nga vetë drejtuesit e këtij shërbimi. Shefja e Pediatrisë së Përgjithshme, doktoresha Numila Kuneshka, ka treguar për News 24 se numri i urgjencave, sidomos në fundjavë, shkon në 440, shifër gati e papërballueshme për stafin mjekësor.
Fluksi nuk është ulur edhe pas shtimit të mjekëve në fundjavë të huazuar nga sistemi parësor. Kjo për shkak të kapaciteteve të pakta dhe infrastrukturës së limituar që ka urgjenca më e madhe pediatrike në vend.
