Mundi i nxënësve ekselentë në shkollën “Niket Dardani” në Tiranë nuk është shpërblyer me marrjen e një burse, ashtu siç u takon. Antonela Murthi ka denoncuar në emisionin “Boom” në Rtv Ora faktin se dajli i saj nuk e ka përfituar këtë vit bursën, ndryshe nga vitet e mëparshme.
Sipas asaj që deklaron Murthi, drejtoresha e shkollës ka harruar të dërgojë emrat e nxënësve ekselentë në Ministrinë e Arsimit.
“Djali im eshtë ekselent. Këtë vit nuk mori bursë sepse drejtoresha më tha se ka haruar të dërgojë emrat e nxënësve në ministri, kështu me ka thene. Ky është problem i drejtoreshës, unë dua që fëmija im të marrë atë që i takon”, thotë nëna.
“Problemi është i imi, ngarkesa e punës, kam anashkaluar dërgimin e dokumentave. Është gjithë shkolla që nuk kam marrë. I kam sqaruar edhe prindërit e tjerë. Do ia paguaj une nga rroga ime, nëse zonja këmbëngul”, deklaron drejtoresha.
Nga biseda me drejtoreshën, ajo tregon se fondi i kalimit të bursave ka kaluar dhe nuk mund të rikthehet procesi nga fillimi.
Drejtoresha e shkollës i premtoi znj. Antonela se do t’i kalonte lekët në numrin e llogarisë në bankë.
Por ka kaluar më shumë se 2 javë dhe lekët nuk janë transferuar ende.
