Sot Gjykata e Apelit ka ndryshuar tërësisht masën e sigurisë për ish-zyrtarët lokalë që u mbajtën në qeli për dosjen “Tërmeti”. Edhe pse ishte një nga operacionet policore më të befasishme, ku u kryen arrestime vetëm në zona ku nuk ishte pësuar asnjë viktimë apo i lënduar, gjykata ka vendosur të lirojë nga masa e arrestit me burg dy ish-kryekomunarët e djathtë Fatbardh Plaku dhe Besnik Fuqia.
Më herët, ishin lënë të lirë dhe në masa ma të lehta pjesa më e madhe e të arrestuarve, ndërkohë që dy ish-zyrtarët lokal bashkë me 4 persona të tjerë u mbajtën në arrest me burg. Operacioni i policisë për ndalimin e 31 personave si përgjegjës për dëmet e tërmetit në periferinë e Tiranës dhe në bashkinë e Vorës përfshiu drejtues teknikë të firmave të ndërtimit, zyrtarë dhe ish-zyrtarë si dhe individë, që sipas akuzës kishin ndërhyrë në strukturat e godinave të ndërtuara para viteve ’90.
Më 15 janar, drejtuesja e Prokurorisë së Tiranës, Elisabeta Imeraj dhe drejtues të Policisë njoftuan në një konferencë për shtyp ndalimin e 31 personave dhe procedimin e 11 të tjerëve për dëmet e tërmetit, mes të cilëve edhe ish-kryetarë të komunave të Farkës dhe Kasharit. Por Gjykata e Tiranës rrëzoi shumicën e kërkesave të Prokurorisë dhe vlerësoi se 6 ndalime ishin kryer në mënyrë të paligjshme. Vetëm shtatë prej të ndaluarve u lanë në masën e “arrestit me burg”, mes të cilëve edhe dy ish-kryekomunarët e njohur, të goditur disa herë nga drejtësia Fatbardh Plaku dhe Besnik Fuçia.
Gjykata vendosi të dërgojë në shtëpi 11 prej të akuzuarve, duke vendosur ndaj tyre masën e detyrimit për paraqitje, ndërsa 12 të ndaluarit e tjerë do të hetohen në masën e “arrestit shtëpiak”.
Më herët, prokurorët e çështjes, Erion Imeraj dhe Alket Mersini kërkuan nga gjykata që t’i vlerësonte arrestimet të ligjshme dhe të vendoste qëndrimin në burg për 19 prej tyre. Prokurorët kërkuan gjithashtu caktimin e arrestit shtëpiak për 7 të ndaluar dhe “detyrim paraqitje” për 4 të tjerë. Avokatët kërkuan nga ana e tyre lirimin e të gjithë të pandehurve, duke i konsideruar arrestimet të paligjshme.
U evidentuan dukshëm paqartësi në veprimet e kryera nga Prokuroria kundrejt të proceduarve të cilët u ndaluan me bujë të madhe. Në seancën e shqyrtimit të masës së sigurisë gjykata fiksoi faktin: Organi procedues ka qenë i paqartë në disa raste kryesisht në konfirmimin, komunikimin dhe qëndrimin për personat e dyshuar në lidhje me akuzat që u atribuohen dhe në lidhje me mënyrën se si ka komunikuar aktet procedurale me cilësinë e personave të ndaluar!
Prokuroria pretendon se në lejet e dhëna nga këta ish-zyrtarë mungojnë studimet sizmologjike, të cilat për një kategori ndërtesash, ato mbi shtatë kate është akt i domosdoshëm; si dhe dokumente të tjera në funksion të marrjes së lejes së ndërtimit. Për objektet e legalizuara, prokuroria thotë se mungojnë aktet për qëndrueshmërinë e tyre duke i cilësuar ato si të domosdoshme. n.k/Fjala.al/
