Tërmeti i 26 nëntorit ka patur një ndikim negativ në rritjen ekonomike dhe sipas Gent Sejkos, ky ndikim do të ndihet edhe përgjatë vitit 2020. Gjithsesi, guvernatori i Bankës së Shqipërisë theksoi se edhe pse ekonomia është goditur nga tërmeti, trendi i zhvillimit nuk është dëmtuar.
“Procesi i rindërtimit pritet të japë një ndikim pozitiv, por pritet të jetë i vonë në kohë dhe jo mjaftueshëm i fortë për të ndikuar efektet negative. Ritmi i rritjes ekonomike pritet të përshpejtohet në afatin e mesëm”, tha ai.
Sipas Sejkos, tejkalimi i pasojave të tërmetit pritet t’i hapë rrugë një rritje më të shpejtë të ekonomisë.
Sa i përket normës bazë të interesit, guvernatori njoftoi se ajo do të mbetet e pandryshuar në shifrën 1%.
