Të rinjtë e Liverpoolit sigurojnë kalimin e ekipit në fazën e 1/8 të FA Cup ku do të përballet me Chelsean. Liverpool madje edhe pa Klopp në pankinë fitoi 1-0 ndeshjen e kthimit ndaj Shrewsbury Town falë një autogoli duke avancuar më tej në FA Cup.
Në Kupën e Gjermanisë ka pasur surpriza në ndeshjet e para të fazës së 1/8 ku janë eliminuar Dortmundi dhe Lajpcig. Milot Rashica ka nxjerrë jashtë verdhezinjtë pasi Werder Bremen ka fituar 3-2 ndeshjen e luajtur mbrëmë dhe siguroi kalimin në fazën çerekfinale. Kosovari Rashica shënoi golin e tretë të takimit ndërsa norvegjezi Haaland realizoi sërish për Dortmundin.
Jashtë Kupës është edhe Lajpcig që u mposht 3-1 në Frankfurt nga Eintrahti vendas. Superior ishte Filip Kostic me dy gola, ndërsa një tjetër e shënoi Andre Silva. Schalke eliminoi Hertha Berlin ndërsa sonte është radha e Bayern Mynih që pret Hoffenhaim.
Granada mposhti 2-1 dhe eliminoi Valencian fituesen në fuqi. Takimin e vendosi një ish-futbollisti i Valencias, Roberto Soldado që shënoi në minutat 3 dhe 90-të me penallti. Sot në mbrëmje Villareal zbret në fushë ndërsa nesër luajnë Real e Barcelona.
