Shkodra ka përjetuar një gjendje tmerri si gjatë natës së mbrëmshme, ashtu edhe sot në mëngjes.
Në mbrëmjen e djeshme rreth orës 22:40, në lagjen “Vasil Shanto”, në Pedonale, ka pasur të shtëna armësh, ku ka mbetur e plagosur në këmbë një grua 35-vjeçare, e cila nuk kishte asnjë lidhje me ngjarjen. Ajo ndodhet jashtë rrezikut për jetën.
Ajo që ka ndodhur në Shkodër dyshohet se është qëlluar drejt një makine luksoze me targa gjermane e parkuar në Pedonale, ku fatmirësisht nuk ka pasur njeri brenda saj. Ndërsa duket se ka qenë një formë kërcënimi për pronarin e saj ende të paidentifikuar.
Ndërkaq policia e Shkodrës, ka dërguar vetëm një informacion gjysmak për ngjarjen që nga nata e mbrëmshme.
“Më datë 05.02.2020, rreth ores 22:40, ne lagjen “Vasil Shanto”, Shkoder, në Pedonale, në rrethana ende të paqarta është plagosur me armë zjarri shtetasja L. J. 35 vjeçe, banuese në fshatin Golem, jashtë rrezikut për jetën. Në vendngjarje ka mbërritur grupi hetimor ku po punon për sqarimin e rrethanave të ngjarjes, identifikimin e kapjen e autorit/ve Janë ngritur pika kontrolli dhe po bëhet krehja e zonës për kapjen e autorëve.”, thuhet në njoftimin e policisë.
Ngjarja e ndodhur mbrëmë në Shkodër, është pasuar nga një tjetër sot në mëngjes, kur një banese i është vendosur tritoli.
Sipas dhënave të para, bëhet e ditur se tritoli është vendosur pranë banesës së Nikolin Arrajt. Lënda plasëse është vendosur pranë portës.
Ndërsa nga shpërthimi fatmirësisht nuk ka pasur të lënduar, pasi familjarët nuk ndodheshin në banesë./Fjala.al/
