Këshilli i Ministrave vendosi të shtojë me 220 numrin e punonjësve në Ministrinë e Brendshme. Përveç shtimit të “krahut të punës” qeveria i ka rritur edhe buxhetin Ministrisë së Brendshme. Fondi është 93 000 000 lekë, të cilët do të shkojnë për shpenzime korrente.
Vendimi është marrë në mbledhjen e djeshme dhe në pikën 2 të tij thuhet se “numri i punonjësve të sistemit të Ministrisë së Brendshme, për vitin 2020, shtohet me 220 punonjës për Inspektoratin Kombëtar të Mbrojtjes së Territorit, duke e çuar numrin e përgjithshëm të sistemit të ministrisë në 14 484 punonjës.
“Në programin “Planifikimi, menaxhimi dhe administrimi”, për Ministrinë e Brendshme, shtohet fondi prej 93 000 000 lekësh në zërin “shpenzime korrente” -thuhet në vendim.
Të njëjtin numër punonjës qeveria do ta shkurtojë në Ministrinë e Turizmit dhe Mjedisit. Për vitin 2020, reduktohet me 220 punonjës, duke e çuar numrin e përgjithshëm të sistemit të ministrisë në 879 punonjës.
Ndërkohë kësaj ministrie do t’i shkurtohen edhe fondet. Në vendim përcaktohet se në Ministrinë e Turizmit dhe Mjedisit, për vitin 2020, në programin buxhetor “Programe për mbrojtjen e mjedisit” reduktohet fondi prej 49 300 000 lekësh, në zërin “shpenzime korrente”, dhe në programin buxhetor “Administrimi i pyjeve” reduktohet fondi prej 43 700 000 lekësh në zërin “shpenzime korrente”.
