Ilir Meta i është rikthyer akuzave ndaj mazhorancës së Partisë Socialiste sa i përket çështjes së Gjykatës Kushtetuese. Në intervistën e dhënë për “Zërin e Amerikës”, Meta akuzoi socialistët se po përpiqen të kapin Gjykatë Kushtetuese.
“Është një kokëfortësi e cila nuk na ndihmon të rrisim besueshmërinë se po mundohemi të realizojmë reformën në drejtësi. Të bësh një ligj mbi Kushtetutën nuk është asgjë tjetër veçse një përpjekje për të shndërruar Gjykatën Kushtetuese në një organizatë partie dhe të hedhësh në erë të gjithë sistemin e drejtësisë. Është për të ardhur keq përpjekja e mazhorancës për të kapur edhe këtë institucion të drejtësisë”, tha Meta.
Presidenti theksoi se dërgimi i çështjes në Komisionin e Venecias është një kohë e humbur për sistemin e drejtësisë dhe të gjithë shqiptarët.
