Dëshmia e penalitet nuk merret më përmes aplikimit në postë dhe pagesës së tarifës në sportelet e saj. Ky dokument mund të merret online dhe pa asnjë kosto. Shërbimi elektronik “Certifikatë e Gjendjes Gjyqësore (dëshmia e penalitetit)” ju mundëson qytetarëve të marrin online certifikatën e gjendjes gjyqësore me nënshkrim elektronik i cili është një dokument që lëshohet për të vërtetuar nëse një person ka qenë i dënuar ose jo.
Bazuar në Vendimin Nr. 495, datë 13.09.2017 “Për miratimin e rregullave të përfitimit të shërbimeve publike elektronike” si dhe në ligjin Nr. 9614, datë 21.09.2006 “Për certifikatat elektronike të gjendjes gjyqësore”, ky dokument me vulë elektronike i gjeneruar përmes portalit e-Albania ka të njëjtën vlerë ligjore si dokumenti fizik me vulë të njomë.
Dokumentacioni i nevojshëm
Për këtë shërbim nuk kërkohet dokumentacion shoqërues.
Hapat e procedurës
- Identifikohuni si qytetar në portalin e-Albania
- Zgjidhni shërbimin “Certifikatë e Gjendjes Gjyqësore (dëshmia e penalitetit)”
- Klikoni butonin “Përdor”
- Plotësoni formularin elektronik dhe klikoni “Dërgo”
Dëshmia me vulë elektronike dërgohet në seksionin “Dokumentet e mia” te hapësira juaj në portalin e-Albania.
Koha e nevojshme e marrjes së shërbimit 6 ditë nga momenti i hyrjes në Sektorin e Gjendjes Gjyqësore. Periudha e vlefshmërisë 3 muaj
