Sot u zhvillua mbledhja e katërt e komitetit të Rindërtimit për banesat e shkatërruara nga tërmeti i 26 nëntorit.
Pritet, që nga qeveria, të shpallet tender ndërkombëtar për rindërtimin e banesave individuale të dëmtuara nga ky tërmet.
Sipas të dhënave nga Ministria e Rindërtimit deri më tani janë bërë rreth 14 mijë aplikime për të përfituar banesën e re.
Brenda pak ditësh Ministria e Rindërtimit do të përzgjedhë modelin e shtëpive, të cilat do të ndërtohen ne tre kategori sipërfaqesh, tashmë të përcaktuara.
Kategoria e parë është për familjet deri në dy anëtarë dhe do të kenë sipërfaqe nga 45-60 metër katrorë.
Kategoria e dytë, për familjet deri në katër anëtarë do të ketë sipërfaqe nga 75 deri në 80 metër katrorë.
Dhe për familjet me 5 anëtarë e më shumë, banesat do të kenë sipërfaqe nga 90 deri në 100 metër katrorë.
Pas përzgjedhjes së modeleve, qeveria do të shpallë tenderin ndërkombëtar me tre lote.
Njëri lot do të jetë për ndërtimin e banesave individuale në Tiranë dhe autoriteti kontraktor do të jetë vetë bashkia.
Loti tjetër do të jetë për banesat e Durrësit dhe do të prokurohet nga fondi i Zhvillimit.
Ndërsa i treti për të gjitha banesat në zonat e tjera që u prekën nga tërmeti, që edhe ky do të prokurohet nga fondi i zhvillimit.
