Një sherr masiv ka shpërthyer ditën e djeshme në ambientet e Fakultetit Filozofik të Universitetit të Prishtinës. Aktivistë të organizatave studentore dhe shoqërisë civile janë sulmuar brutalisht, teksa po përgatiteshin të mbanin një prezantim mbi minierat në Shqipëri.
Aktivistët janë konsideruar “komunistë të korruptuar”, ndërkohë që në takim do të merrte pjesë edhe pedagogu nga Tirana, Arlind Qori.
Aktivisti i shoqërisë civile, Durim Jasharaj, përmes një shkrimi në rrjetin social Facebook, i ka quajtur “banditë” personat që kryen sulmin teksa është shprehur se sulmuesve u ka penguar prezantimi që aktivistët kishin planifikuar ta mbanin. Jasharaj ka treguar se prezantimi ka pasur të bëjë me sindikalizmin në Shqipëri.
“Ata akuzonin profesorin dhe aktivistin Arlind Qori si dhe sindikalistin tashmë të përjashtuar Elton Debreshin. Po jua le juve ta gjeni se kë ata mbronin. Po jua le juve ta gjeni se kush e urdhëroi këtë grup banditësh ta sabotonin organizimin”, ka nënvizuar aktivisti Durim Jasharaj.
