Lirimi me kusht i të dënuarve me rrezikshmëri të lartë kriminale, është bërë shkak për nisjen e një hetimi në të gjitha burgjet ne vend. Drejtoria e Përgjithshme e Burgjeve po inspekton dosjet e 3 viteve të fundit, për të parë nëse ka shkelje të kryera nga punonjësit e edukimit apo të sektorit juridik, që mund të kenë favorizuar të dënuarit për të përfituar lirinë me kusht.
Urdhri i firmosur nga kreu i Bugjeve, Agim Ismaili, u është shpërndarë të gjitha IEVP në vend dhe prej 10 ditësh, janë duke u inspektuar dosjet e të dënuarve që kanë përfituar nga lirimi me kusht. Sipas News24, një burim nga burgjet tha se të gjithë punonjësit që do të gjenden me shkelje, do të kallëzohen penalisht në prokurori. Të dënuarit, të cilët ja kanë dalë të fitojnë lirinë me kusht, kanë marrë në njëfarë mënyrë edhe bekimin e zyrtarëve të burgjeve.
Kjo sepse në raportet dorëzuar në gjykata, për pjesën dërrmuese të të dënuarve, punonjësit e burgjeve i kanë vlerësuar për sjellje shumë të mirë, edhe të dënuarit që paraqesin rrezikshmëri shumë të lartë shoqërore.
Lirimet me kusht janë shndërruar në një shqetësim të madh kohët e fundit dhe për këtë shkak, për këtë shkak Inspektori i Lartë i Drejtësisë, Artur Metani tha se do ti ketë prioritet të punës se institucionit që drejton.
