Një megaoperacion policior është realizuar nga policia e Maqedonisë së Veriut në koordinim me Policinë Italiane, në fshatin Krushopek të Komunës së Sarajit, ku sekuestroi 1.3 ton kokainë.
Droga është gjetur në një magazinë por ende nuk dihet se si ka përfunduar në atë vend 1.3 ton kokainë. Sipas mediave në Maqedoni, thuhet se kokaina fillimisht ka ardhur nga Amerika Latine në Bar të Malit të Zi.
Më pas ka hyrë në qytetin e Shkodrës dhe më pas ka dalë nga Qafë-Thana për në Maqedoni. Kokaina duhej të shkonte në Koper të Sllovenisë por deri më tani nuk bëhen të ditura arsyet që kanë ndryshuar destinacionin e drogës, duke përfunduar Krushopek të Komunës së Sarajit në Maqedoni.
Mediat maqedonase bëjnë me dije se si pasojë e aksionit kanë rënë në pranga të paktën 3 persona, 2 shoferë dhe 1 magazinier që punonin në magazinën e frutave ku u gjet edhe droga.
Aksionin e konfirmoi më herët edhe vetë ministri i Punëve të Brendshme Naqe Çulev, i cili në rrjetin social Facebook ka shkruar se “Ministria e Punëve të Brendshme është duke ndërmarrë një gamë të gjerë të masave dhe aktiviteteve operative.
Më udhëzimin e Prokurorit Publik dhe me urdhër të gjykatësit të procedurës paraprake, bëhen kërkime në zonën e fshatit Krushopek afër Shkupit për trafikim ilegal të drogës. I gjithë kapacitet i MPB-së është vendosur në mbrojtjen dhe sigurinë e shtetit.
Ka kaluar koha kur udhëheqësia e lartë e MPB-së kanë bashkëpunuar dhe kanë mbështetet strukturat kriminale të vendit. Ne do të njoftojmë më shumë informacion për publikun gjatë ditës së nesërme”, ka shkruar Çulev në Facebook.
