Gent Cakaj, ministër i Jashtëm në detyrë i Shqipërisë, ka zhvilluar sot një vizitë zyrtare në Kosovë ku është takuar me liderët kryesorë. Në takimin e zhvilluar në Kryeministri midis Albin Kurtit dhe Cakajt, diskutimi është fokusuar në bashkëpunimin diplomatik midis dy shteteve.
Cakaj dhe Kurti janë dakordërsuar se ky bashkëpunim duhet të nisë në terrenin e përfaqësimeve diplomatike të përbashkëta. Përplotësimi i personelit diplomatik si dhe vendosja e ambasadave në të njëjtën adresë e ndërtesë përbëjnë koordinim bashkëpunimi në planin e interesave.
“Këto interesa aktualisht janë mbrojtja dhe rritja e njohjeve të shtetit të Kosovës, si dhe përçimi i mesazhit të një perspektive përbashkuese”, thuhet në njoftimin e Kryeministrisë së Kosovës.
