Puna s’ka përfunduar ende, por artistët kanë filluar të futen në godinën e Tetarit të Operat dhe Baletit, e cila tanimë është duke marrë formën përfundimtare pas ndërhyrjeve në rikonstruksion
“Kishte ardhur koha të ktheheshin në shtëpi dhe gëzimi ishte i lexueshëm në sytë e tyre. Ndonëse janë ende në fazën e orientimit, në korridoret dhe sallat e reja, ata kanë nisur punën për projektet e ardhshme. Kënaqësi të isha sot bashkë me artistët, në ambientet e rikonstruktuara të Teatrit Kombëtar të Operës, Baletit dhe Ansamblit Popullor”, bën të ditur ministrja e kulturës Elva Margariti ne Facebook.
Pas më shumë se 60 vitesh nga ndërtimi, godina e TKOB-së iu nënshtrua për herë të parë rikonstruksionit. Projekti, që kapte shifrën e 1 miliard lekëve, synonte t’i rikthente dinjitetin artit dhe artistëve që vijojnë të performojnë në këtë skenë.
“Të bindur se artistët meritojnë më shumë, ndërmorëm këtë hap të guximshëm, për të nxjerrë në dritë një nga institucionet më të rëndësishme kulturore në vend. Një investim madhor, për të cilin ia vlente pritja. Por gjithsesi, do të kisha dashur të falënderoja çdo artist, një për një për sakrificat e këtyre tri viteve; prapavijën e padukshme, por që mban një peshë të jashtëzakonshme në realizimin e një vepre dhe çdo partner që na mbështeti në këtë sfidë Shfaqja e parë në skenën e re do të jetë me të vërtetë një moment historik, por edhe akomodimi i artistëve në shtëpinë e rinovuar, ishte pa dyshim një ngjarje e madhe. Gjithçka premton një erë të re për Teatri Kombëtar i Operas, Baletit dhe Ansamblit Popullor”, shprehet Margariti.
