Koronavirusi po rrezikon seriozisht fqinjin tonë, Italinë. Pas humbjes së dy jetëve ditën e sotme, dhe rritjes së numrit të të prekurve nga koronavirusi, Italia ka izoluar edhe 10 fshatra.
Numri i të prekurve ka arritur në 55, ku 39 raste të konfirmuara janë në rajonin verior të Lombardisë dhe 12 në rajonin Veneto.
Shifrat i bëri të ditura kreu i departamentit të shëndetit të Lombardisë, Giulio Gallera, në një konferëncë për shtyp ditën e sotme.
Ndërkaq, një paciente 77-vjeçare me koronavirus u gjet e vdekur në shtëpinë e saj në Lombardi. Sipas Galleras, ajo është viktima e dytë e koronavirusit në Itali.
Italia ka pezulluar të gjitha aktivitetet publike dhe ka izoluar 10 fshatra në jug të Milanos.
Sipas faqes së internetit të rajonit të Lombardisë, stacionet e trenave në tre vende të prekura nga koronavirusi, si Codogno, Maleo dhe Casalpusterlengo, janë mbyllur që nga pasditja e sotme.
