Bullizmi ose talljet siç e njohim ne në shqip, është një fenomen shqetësues dhe në shoqërinë shqiptare.
Një histori e tillë u transmetua në emisionin “Dua të të bëj të lumtur”, ku nëna ftoi në program vajzën e saj adoleshente e cila bullizohet në ambientet e shkollës për shkak të pamjes së jashtme.
Elisa është albine, që do të thotë se ka pak ose nuk ka fare pigmentin e melaninës. Nga mungesa e melaminës Elisa ka probleme në shikim, lëvizje të pavullnetshme të syve, lëkurë të bardhë dhe flokë biond. Pikërisht për këto tipare adoleshentja është bullizuar nga moshatarët e saj.
Mamaja e Elisës në studion e emisionit tha se vajza e saj shpesh herë është ndjerë jo e pranuar në shoqëri dhe aktivitete të ndryshme që zhvillohen në ambientet e shkollës.
I ftuar surprizë për Elisën ishte Bes Kallaku, një personazh të cilin ajo e admiron. Ai i dha një mesazh të veçantë vajzës duke i treguar dhe për sakrificat që ai ka bërë për të arritur aty ku është sot dhe madje tregoi publikisht se edhe ai është bullizuar kur ka ardhur në fillim në Tiranë.
Veç mesazheve, Besi i premtoi vajzës se në filmin e tij të dytë, Elisa do të jetë një prej aktorëve./Fjala.al
