Masakra e 5-fishtë në Gjilan vazhdon të trondisë për sa i përket mekanizmit se si ka ndodhur ngjarja e rëndë. Prokuroria e Gjilanit ka dalë në një përfundim, referuar edhe të dhënave që kanë dalë nga mjekësia ligjore se krimet e rënda të vrasjes së katër pjesëtarëve të familjes Bllaca nga vajza e familjes, Valdetja kanë ndodhur fiks në orën 07.40 minuta.
Pasi ka kryer vrasjet, që mësohet se, vëllanë e vogël e ka vrarë të parin në katin e dytë! Pastaj ka zbritur në të parin dhe ka hasur në të ëmën dhe të vëllanë të cilët janë nisur të dalin jashtë për të parë çka ndodhur. I ka vrarë të dy në korridor me nga katër plumba secilin. Më pas në dhomën e ndenjes ka qëlluar edhe të atin, i cili është gjetur në mesin e sallonit ku rrinin familja.
Dyshohet se vëllai i vogël ende nuk ka qenë zgjuar nga gjumi. Nga aty ajo ka folur me tezen e vet në telefon dhe kanë dalë e pirë kafe deri rreth orës 12.30. Më pas tezja ka tentuar të vinte tek shtëpia e motrës së vet t`i takonte, por Valdetja ka kundërshtuar vizitën e tezes dhe të djalit të saj me argumentin se familja nuk janë në shtëpi dhe se edhe asaj i duhej të dilte të ikte në punë.
Dhe në fakt, tezja dhe djali e kanë shoqëruar deri në oborr. Aty janë kthyer për të ikur drejt banesës së tyre dhe në atë moment, që sipas prokurorisë përkon fiks me orën 12.50 minuta, Valdetja ka qëlluar veten me dy plumba. Të dhënat shkencore kanë vërtetuar se njërin plumb e kishte marrë në pjesën e shputës së këmbës dhe tjetrin në ballë. Pak a shumë në të njëjtën pjesë të kokës ku edhe kishte qëlluar gjithë familjen e saj.
Sipas të dhënave që dalin nga procesi hetimor i ngjarjes së rëndë mësohet se janë mbledhur të gjitha praktikat këshilluese. Janë 14 seanca të tilla në të cilat Valdetja është këshilluar me një psikolog që gjendet në shërbim të policisë. Po ashtu mësohet se është kërkuar edhe urdhri i lëshuar nga drejtoria e Policisë së Shtetit të Kosovës që efektivja e policisë Valdete Bllaca nuk mund të shërbente më me armë dhe me uniformën e Policisë së Kosovës. Për pasojë asaj iu ka mbajtur arma në kasafortën e postës policore të zonës në të cilën ishte caktuar të shërbente.
Askush nuk di të thotë se cila ishte arsyeja që e çoi punonjësen e policisë në atë krim të pesëfishtë, por hetuesit hedhin dyshimin se mos bëhet fjalë për acarimin e gjendjes në momentin që i kanë hequr të drejtën të jetë efektive e policisë! Hetimet vazhdojnë, po ashtu janë marrë edhe një sërë dëshmish nga të njohur të saj, ndërkohë që prokuroria ka sekuestruar edhe një kartelë mjekësore bashkë me medikamentet që merrte efektivja! n.k/Fjala.al/
