Gjykata e Apelit të Prishtinës ka rezervuar një lajm aspak të mirë për kryetarin e Federatës së Futbollit të Kosovës. Kjo pasi është lënë në fuqi vendimi i mëparshëm i Gjykatës së Shkallës së Parë dhe si pasojë Agim Ademi do të përballet me një dënim prej 9 muajsh burg. Arsyeja është për akuzën e kërcënimit dhe të përfitimit të parave në mënyrë të paligjshme.
Sipas të dhënave që vijnë nga mediet e Kosovës bëhet me dije se gjithçka i përket ngjarjes së ndodhur në vitin 2012-të, kur kreu aktual i FFK-së së bashku me Muharrem Ramën kanë shkelur ligjin duke kërcënuar Dritan Kadollin. Madje sipas gjykatës së Kosovës ata kanë kërkuar të përfitonin prej tij një shumë 30 mijë eurosh dhe një makinë të tipit “BMW X5”. Nga informacionet që shoqëruan pretendimet e palëve u mësua se këto do të përdoreshin për kryetarin e Asamblesë Komunale të Prishtinës, Sami Hamiti, i cili do të lejonte ndërtimin në një sipërfaqe toke që cilësohej si “zonë e gjelbër”.
Ndërkohë, Agim Ademi duket i vendosur për ta fituar me çdo kusht çështjen dhe të dalë i pastër nga kjo histori. Këtë e vërteton edhe fakti se ka punësuar një tjetër avokat për ta mbrojtur përpara drejtësisë së Kosovës. Gjithsesi një vendim me 9 muaj burg ka sjellë një gjendje kaosi në Federatën e Futbollit të Kosovës, ku ende nuk dihet se çfarë rruge do të ndiqet për më tej. n.k/Fjala.al/
