I dërguari i posaçëm i Shteteve të Bashkuara të Amerikës për dialogun Kosovë-Serbi, Richard Grenell, ka reaguar ashpër ndaj vendimit të Albin Kurtit për të hequr me kushte tarifën ndaj Serbisë.
Sipas Kurtit, më 15 mars tarifa do të largohet pjesërisht, ndërsa nëse nuk vepron Serbia dhe BE-ja, tarifa do të rikthehet sërish në 100 për qind më 15 qershor.
Por, Grenell përmes një shkrimi në Twitter, nuk e ka mbështetur Kurtin, duke thënë se pozicioni i SHBA-së është i qartë dhe se tarifa duhet të hiqet plotësisht. Ai shkruan më tej se Kurti ka bërë një gabim shumë serioz.
“Ne nuk e mbështesim heqjen e tarifës pjesërisht nga kryeministri Albin Kurti. Pozicioni ynë është mjaft i qartë: tarifa duhet të largohet plotësisht. Kurti është duke bërë një gabim serioz – dhe kjo iu bë e qartë edhe Presidentit Thaçi në Shtëpinë e Bardhë Bardhë”, ka shkruar Grenell.
We do not support Prime Minister Kurti’s half measure. Our position is quite clear: the tariffs must be completely dropped. Mr Kurti is making a serious mistake – and that was made clear to President Thaci at the White House today.
— Richard Grenell (@RichardGrenell) February 27, 2020
Ndërkaq, po dje më herët kryeministri i Kosovës, Albin Kurti doli në një konferencë për shtyp duke deklaruar se do ta heqë tarifën për importin e lëndës së parë nga Serbia dhe Bosnja Hercegovina. Ndërsa ka renditur edhe kushtet për Serbinë.
“Pas takimeve me prodhuesit vendorë, kam ardhur tek ky qëndrim sa i përket tarifës 100%. Si Qeveri e Kosovës, nga java e ardhshme kemi vendosur që më 15 mars të hiqet taksa ndaj lëndës së parë”, ka thënë Kurti në konferencën për media.
Ai ka ftuar Serbinë që si përgjigje ndaj këtij vendimi të zotohet se do ta ndërpres fushatën për ç’njohjet rreth Kosovës.
Kurti ka thënë se taksa tërësisht do të hiqet më 1 prill për një periudhë 90 ditore.
Kurti thotë se nëse Serbia nuk reflekton, tarifa do të rikthehet përsëri.
“Nëse pala serbe nuk reflekton përsëri, atëherë qeveria e Kosovës me fillim nga data 15 qeshor do ta rikthejë tarifën përsëri”.
“Reciprociteti i plotë tregtar instalohet pas 15 qeshorit”, shtoi Kurti.
