Në vendin fqinj, Maqedoninë e Veriut dyshohet për rastin e dytë të coronavirusit. Bëhet fjalë për shoferin e furgonit që ka transportuar gruan 50 vjeçare, e konfirmuar tashmë e infektuar me virusin e rrezikshëm.
Shoferi është shtruar në spitalin e Strumicës dhe mjekët po kryejnë analizat e nevojshme. Ai u paraqit me kollë dhe dhimbje gjoksi.
Sipas raportimeve, pas identifikimit të gruas me coronavirus, shoferi ishte vetëizoluar në shtëpi dhe nuk ka patur kontakte me familjarët, deri sa gjendja e tij shëndetësore është përkeqësuar. Në izolim shtëpiak po qëndrojnë edhe 11 personat e tjerë që ndodheshin në furgon me gruan e infektuar.
Sa i përket gruas, ajo ndodhet në spital në gjendje të stabilizuar.
Ndonëse është vetëm një rast i identifikuar zyrtarisht dhe priten përgjigjet e analizave për rastin e dytë të dyshuar, Qeveria maqedonase ka miratuar një vendim ku rekomandohet anulimi i tubimeve massive.
“Rekomandimi i Qeverisë ka të bëjë me mbledhjet më të mëdha publike të cilat planifikohen këtë periudhë, siç janë karnavali i Strumicës, ai “Proçka” dhe të ngjashme. Qeveria rekomandon që organizatorët e ngjarjeve sportive, deri më 6 mars të mbahen pa prezencën e publikut. Të njejtin rekomandim Qeveria e dedikon edhe për manifestimet e tjera më të mëdha argëtuese kulturore–shkencore”, thuhet në vendimin e Qeverisë.
Numri i të infektuarve me coronavirus ka tejkaluar 82 mijë në të gjithë botën, ku pjesa kryesore ndodhen në Kinë.
