Më 2 mars, presidenti Ilir Meta ka thirrur një manifestim në bulevardin kryesor të Tiranës dhe mesa duket mbështetësit e tij janë kujdesur që të tërheqin vëmendje edhe përpara fillimit të derbit Tirana-Partizani.
Një banderolë është shpalosur pranë stadiumit “Air Albania” ku njoftohet për manifestimin.
“Derbi historik Tirana-Partizani edhe mbrëmë i dhuroi kryeqytetit e mbarë sportdashësve një ngjarje të jashtëzakonshme festive, me emocione tepër të forta, falë spektaklit si të lojtarëve në fushën e blertë, ashtu edhe të tifozëve që shkëlqyen si përherë me koreografitë e tyre brilante. Një falenderim special tifozëve të mrekullueshëm, për vëmendjen e tyre për Manifestimin Mbarëkombëtar të 2marsit”, shkruan Meta.
Manifestimi është thirrur nga Meta kundër atij që e quan “grusht shteti” për kapjen e Gjykatës Kushtetuese nga mazhoranca e drejtuar nga Edi Rama.
