Në lagjen 14 të Shkozetit në Durrës është krijuar një panik i madh te qytetarët për shkak të ekzekutimit të dy personave. Viktimat Anxhelo Avdia dhe Dorian Shkoza, 35 vjeç, raportohet se janë qëlluar teksa po lëviznin në këmbë në afërsi të tregut të perimeve.
Një automjet në lëvizje ka hapur zjarr me kallashnikov ndaj dy personave. Një prej tyre ka ndërruar jetë në vend, ndërsa tjetri humbi jetën teksa po transportohej për në spitalin e Durrësit. Dyshohet se lëvizjet e viktimave janë ndjekur për një kohë të gjatë nga ekzekutorët.
Shërbimet e Policisë kanë mundur të identifikojnë targat e automjetit nga i cili u qëllua dhe janë vënë në ndjekje të autorëve.
Policia ka ngritur mënjeherë pika kontrolli dhe është rrethuar zona në një perimetër të gjerë. Pika kontrolli janë ngritur edhe nga DVP Tiranë e Fier në aksin rrugor Durrës-Tiranë e Durrës-Lushnjë. Në mbështetje të Policisë vendore janë nisur dhe grupe të FNSH-së së Tiranës, për krehjen e zonës.
Për zbardhjen e ngjarjes, në ndihmë të grupit hetimor po shkojnë specialistët e Krimeve të Rënda në Departamentin e Policisë Kriminale.
