Arben Malaj, tashmë pjesë e Partisë Agrare Ambientaliste, nuk ka mohuar një koalicion të mundshëm të kësaj partie me Partinë Socialiste të drejtuar nga Edi Rama.
I ftuar në emisionin “Top Talk” në Top Channel, ish-ministri i Financave në qeveritë socialiste u pyet nëse është i pamundur një koalicion me PS-në në të ardhmen dhe përgjigjja që dha nuk konfirmon një refuzim të prerë të PAA-së.
“Këshilltarët nuk flasin për vendime që i marrin strukturat”, tha Malaj.
Partia Agrare Ambientaliste drejtohet nga Agron Duka dhe është aktualisht pjesë e grupit të opozitës së bashkuar që udhëhiqet nga Partia Demokratike.
