Përballja mazhorancë-president ka zbritur në rrjetet sociale në një përballje midis zëdhënësve të partive. Duke u përpjekur të sulmojnë njëri-tjetrin, PS dhe LSI duket se po shkaktojnë më shumë dëme dhe po tregojnë “të palarat”.
Besian Ajazi, këshilltar i Taulant Ballës, publikoi një foto të presidentit Meta në tavolinë me Altin Hajri. Ky i fundit është shpallur në kërkim për rrëmbimin dhe zhdukjen e shtetasit Jan Prenga, ndërsa resorti “Golden” iu sekuestrua nga OFL-ja.
“Më vjen keq për gjuhën që përdor në mënyrë të vazhdueshme zëdhënësi i Presidentit, ish-kolegu im Tedi Blushi dhe keqpërdorimin e tij nga ana e Presidentit apo kushdo që i shkruan. Zoti President nëse sjellja juaj në këto kohë vjen nga dhimbjet që po shkakton OFL në botën e krimit atëherë po të themi mirë është të mos merresh me Hajrin se nuk ke për të bërë kurrë hajër. P.s. Foto e Presidentit Ilir Meta në Vilën “Golden” në Shijak, e sekuestruar nga OFL, në pronësi të grupit kriminal “Hajri”,- shkruan Ajazi.
Por këtij publikimi i është përgjigjur Elona Guri, pjesë e Lëvizjes Socialiste për Integrim. Ajo nuk mohon që përballë Presidentit të Republikës qëndron i ulur Altin Hajri, por përqëndrohet vetëm te fakti se foto është bërë në resortin e deputetit Lefter Koka dhe jo te resorti “Golden”.
“Si gjithmonë, Besiani vijon ulet në gjunjë para pantallonave të Taulantit. Besian, ti e di shumë mirë, siç e di gjithë Durrësi mbarë, që ajo është pista e Lefter Kokës. Foto juaj, tregon një prej festave të Lefter Kokës. Se perdet janë të njëjta. Shih fotot. Ka edhe të tjera plot. Aty keni edhe deputeten e Lefterit, në krah të tij, ndërsa për personin në fjalë, me sa shoh, në dy karrige janë ulur tre burra. Meqënëse e keni në grupin tuaj parlamentar, merrjani sqarimet deputetit tuaj, Lefterit, i cili ka bërë ftesat dhe fotot. Pastaj, për detaje të mëtejshme, shoqja Etilda mund t’ju sqarojë më shumë. Meqënëse e ke qef OFL, mos harro të ndiqni jo vetëm ata në foton që publikove, po dhe këta këtu poshtë. P.S: Kujt ja kanë marrë fëmijën peng e di gjithë Durrësi”, shkruan Elona Guri.
Ajo publikon edhe një foto të kryeministrit Edi Rama me anëtarë të Hajrave, ku në tavolinë ndodheshin edhe Saimir Tahiri, Blendi Klosi e Vangjush Dako.
Miq apo jo, këto foto tregojnë se banda e Hajrave nuk e ka patur aspak vështirë të gjendet në një ambient me të gjithë liderët e shtetit. Të mos harrojmë se Altin Hajri sot ndodhet ende në kërkim. Policia e Shtetit nuk po e gjen dot.
