Ish-presidenti i UEFA-s, Mishel Platini, ka humbur apelimin në Gjykatën Evropiane të të Drejtave të Njeriut për heqjen e përjashtimit për 4 vite nga çdo aktivitet futbollistik. Ndalimi i Mishel Platinisë nga futbolli “ishte i justifikuar” sipas Gjykatës Evropiane të të Drejtave të Njeriut (KEDNJ), pasi kundërshtoi apelin e ish-presidentit të UEFA-s.
Platini dhe ish-homologu i tij i FIFA-s, Sep Blater, u shpallën fajtorë në vitin 2015 për shkelje të etikës dhe përfitim të mbi 2 milionë frangave zvicerane (1.3 milionë euro).
Francezit fillimisht iu dha një ndalim tetëvjeçar, i cili përfundimisht u reduktua në katër në apel. KEDNJ tha se sanksioni “nuk dukej i tepërt ose arbitrar”. Platini, 64 vjeç, dha dorëheqjen nga posti i tij si president i UEFA-s në 2016-ën, pasi apeli i tij u refuzua në Gjykatën e Arbitrazhit të Sportit (CAS), megjithëse kohëzgjatja e sanksionit ishte zvogëluar në katër vjet. Sidoqoftë, gjoba prej 60.000 frangash zvicerane (33.700 euro në atë kohë) mbeti.
Për këtë gjobë Platini tha, në tetor, se ai nuk do ta paguante derisa të ishte dhënë vendimi i KEDNJ-së. Lidhur me këtë apel të fundit për KEDNJ, Platini kundërshtoi gjykimin e CAS, sipas tij, për tri arsye: të drejtën për një seancë të ndershme, që rregullat e FIFA-s ishin përdorur në mënyrë retrospektive ndaj tij dhe se ndalimi ishte i tepërt.
Në gjykimin e tij, KEDNJ tha: “Gjykata konstatoi në mënyrë të veçantë që duke marrë parasysh seriozitetin e sjelljes së keqe, pozicionin e lartë të mbajtur nga z. Platini në organet drejtuese të futbollit dhe nevojën për të rivendosur reputacionin e sportit dhe të FIFA-s, sanksioni nuk u duk i tepruar ose arbitrar”.
FIFA shtoi se kishte mbajtur shënim për gjykimin, për të cilin thotë se ishte në përputhje me vendimin origjinal të Komitetit të tij të Etikës dhe më pas konfirmuar nga CAS dhe gjithashtu nga Gjykata Federale Zvicerane. “Magjia” 17-vjeçare e Blaterit në krye të FIFA-s përfundoi në vitin 2015 dhe ai aktualisht po vuan një pezullim 6-vjeçar nga futbolli./Fjala.al/
