Skënder Gega ka treguar për emocionet e titullit kampion që fitoi me Partizanin në sezonin e kaluar. Ish-trajneri i të kuqve ka thënë për “Supersport” se kishte dëshirë të madhe për të qëndruar te Partizani, por për disa arsye personale vendosi të largohet, duke ia kërkuar këtë edhe presidentit Gazmend Demi.
Në këtë intervistë ai ka rikujtuar emocionet e titullit kampion dhe ka folur për presionin që ka pasur gjatë gjithë vitit.
“I kam riparë shumë herë sepse janë kujtime, pasi për mua kanë qenë të veçanta pas një viti të lodhshëm dhe me presione të sezonit. Kanë qenë lot gëzimi dhe nuk i kontrolloja dot dhe e kam përjetuar në mënyrë më të mirë.
Vazhdoj akoma ta kujtoj dhe në momentin që ra bilbili doja t’i përqafoja të gjithë me radhë tifozët që erdhën drejt meje. Gjithmonë jam munduar të jap respekt për të gjithë te Partizani dhe ai qe viti i këtij grupi që edhe unë kam qenë pjesë.
Gjithë vitin u mundova të isha i përmbajtur pasi duhet të reflektohej edhe te ekipi. Nuk shfaqja asnjëherë momente negative te skuadra gjithë sezonit, tregoja vetëm gjëra pozitive. Familja është frymëzim për të gjithë dhe janë ata që gëzohen të parët për suksesin tënd”-tha Gega.
Ndërsa për largimin nga skuadra e Partizanit, tekniku ka thënë se ishte vendim i marrë për arsye personale.
“Mendoj se gjërat e mia janë vetëm të miat, doja të vazhdoja, por u krijuan disa arsye personale që unë duhet të vazhdoja. Ka momente kur nuk përputhen edhe mendimet. Unë kam qenë gjithmonë i drejtpërdrejtë me të gjithë. Jam munduar që gjërat që kam për vete t’i mbaj vetëm unë, pasi kisha besim se do ia dilja.
Pas një bisede me Demin i kam kërkuar largimin, ku nuk këmbënguli për të më mbajtur. Në atë periudhë ashtu e vendosa dhe ashtu ndodhi. Në Shqipëri kam ardhur sepse kam arsye të tjera, por jo për t’i marrë vendin ndonjë tjetri.
Unë e dua Partizanin dhe e dua atë fanellë, shkova në derbi sepse e dua atë fanellë dhe nuk kam shkuar në stadium për t’i krijuar presion askujt.”-shtoi ndër të tjera Skënder Gega./Fjala.al/
