Janë mbyllur në paqe me barazimet 1-1 dy takimet e orës 14:00 të Superligës ditën e sotme.
Luftëtari-Bylis dhe Teuta-Flamurtari mbyllën pak minuta më parë javën e 26-ë të Kategorisë Superiore dhe të katra këto skuadra janë ndarë me nga 1 pikë.
Ndeshja midis gjirokastriteve dhe ballshiotëve u zhbllokua në minutën e 35-ë të lojës nga goli i realizuar nga një penallti e Saliou Guindo. Megjithatë ky avantazh nuk zgjati shumë, pasi pa kaluar 8 minuta Gresild Lika arriti që të barazonte shifrat për ekipin e Luftëtarit dhe t’i siguronte skuadrës së tij 1 pikë nga kjo përballje.
Ndërkohë edhe sfida në Durrës u mbyll me po të njëjtin rezultat. Skuadra e Flamurtarit arriti që të merrte 1 pikë, ndonëse me rezultatet e deritashme e ka të sigurt rrëzimin nga kategoria. Ishin vlonjatët ata që shënuan të parët me Shaqir Harunin në minutën e 13-ë të lojës, duke kërcënuar kështu vendasit.
Megjithatë “Djemtë e Detit” nuk u ndalën derisa gjetën portën për të marrë barazimin. Pikën për skuadrën e Teutës e siguroi Arbër Çyrbja në minutën e 52-ë të këtij takimi, duke mbajtur kështu gjallë shpresën e durrsakëve për vazhdimësinë.
Aktualisht Teuta vazhdon të qëndrojë në vend të 4-t, Flamurtari renditet i fundit, Luftëtari në vend të 9-ë ndërsa Bylisi vazhdon të qëndrojë në vend të 7-ë.
Megjithatë janë për t’u zhvilluar dhe tre takime të tjera dhe nëse Partizani arrin të triumfojë ndaj Vllaznisë në Shkodër, kjo gjë do sillte rrëzim me një vend të Teutës në renditjen e Superligës./Fjala.al/
