Konfirmimi i dy rasteve me koronavirus në vendin tonë ka ngritur në këmbë të gjitha institucionet dhe në mëngjesin e sotëm u zhvillua një mbledhje e qeverisë, nga ku u bë me dije se do të shtyhen deri në 3 prill të gjitha aktivitetet përfshirë edhe ato sportive.
Megjithatë ditën e sotme ishin planifikuar për t’u zhvilluar dy takimet e fundit të javës së 26-ë të Superligës, ajo mes Vllaznisë dhe Partizanit si dhe ndeshja Skënderbeu-Kukësi që duhet të zhvillohen të dyja në orën 18:00.
Ndonëse nga Federata Shqiptare e Futbollit dhe nga vetë klubet nuk është publikuar ndonjë njoftim zyrtar për zhvillimin apo jo të këtyre takimeve, apo mënyrën e zhvillimit, “Fjala.al” ka mësuar se ndeshja mes korçarëve dhe verilindorëve nuk do të anulohet.
Megjithatë ndonëse nuk është ende e sigurt ky takim ka shumë gjasa të mbahet me dyer të mbyllura, për të evituar përhapjen e virusit më shumë./Fjala.al/
