Federata Shqiptare e Futbollit ka bërë publik njoftimin se dy ndeshjet e javës së 26-të të Superligës, midis Vllaznisë dhe Partizanit si dhe sfida Skënderbeu-Kukësi do të zhvillohen me dyer të mbyllura në orën 18:00.
Konfirmimi i dy rasteve me koronavirus në vendin tonë ka çuar në mbylljen e shumë aktiviteteve, madje në fillim u tha se çdo ngjarje sportive do të shtyhej deri në 3 prill.
Megjithatë FSHF ka njoftuar mediat se ndeshjet e ditës së sotme do të mbahen,ndërsa për vazhdimësinë e aktiviteteve do i kërkohet Këshillit të Medias një takim.
“Njoftim nga Federata Shqiptare e Futbollit lidhur me aktivitetin futbollistik
Komiteti i Emergjencës në Federatën Shqiptare të Futbollit është mbledhur ditën e sotme për të vlerësuar situatën pas të urdhërit nr. 132, dt. 8/3/2020 të Ministrisë së Shëndetësisë dhe Mbrojtjes Sociale lidhur me pezullimin e aktiviteteve sportive dhe sociale në vend.
Komiteti i Emergjencës vlerësoi se duke qenë se katër ekipet janë grumbulluar tashmë respektivisht në Shkodër (Vllaznia-Partizani) dhe Korçë (Skënderbeu – Kukësi), të vijojë me zhvillimin e këtyre dy ndeshjeve të javës së 26-të të Kategorisë Superiore, me dyer të mbyllura.
Komiteti i Emergjencës në FSHF, i kërkon Këshillit të Ministrave një takim për të diskutuar në detaje lidhur me vijimësinë e aktiviteteve futbollistike në vend.”-thuhet në njoftimin e FSHF-së./Fjala.al/
