Pas lirimit nga Gjykata e Apelit Tiranë, shtetasi turk Selami Simsek u dërgua në Drejtorinë e Kufirit dhe Migracionit dhe nuk është marrë vendimi përfundimtar, sipas të atit, nëse do të ekstradohet drejt Turqisë apo do të dërgohet në kampin e refugjatëve që ndodhet në zonën e Babrrusë në Tiranë.
Simsek kërkohet nga autoritetet turke pasi akuzohet si pjesë e Lëvizjes Gylen.
“Im bir pasi kreu dënimin me burg prej tetë muajsh, shkoi tek Drejtoria e Emigrimit dhe Kufirit, pasi kreu të gjitha procedurat për të kërkuar azil, pasi doli nga zyra e emigrimit, ai nuk shkoi në Babrru tek kampi ku ishte përgatitur të shkonte, por shëtit që prej pasdites me makinë, dhe jam në ankth se çfarë do të bëhet me fatin e tim biri”, është shprehur babai i i Selami Simsek.
Gjykata e Tiranës vendosi në fund të muajit janar dënimin me 12 muaj burg të Simsek për akuzën ‘falsifikim dokumentesh’, pasi u kap në aeroportin e Rinasit në tentativë për tu larguar drejt Kanadasë me pasaportë false. Por Gjykata e Apelit pranoi së fundmi kërkesën e tij për t’u liruar nga qelia.
Simsek u ndalua në Rinas në të njëjtën ditë me shtetasin tjetër turk Harun Çelik, i cili është ekstraduar tashmë drejt Turqisë.
Por mbrëmjen e djeshme, Policia e Tiranës ka shoqëruar në komisariat gazetarin Bekim Bici pasi ky i fundit po raportonte për ngjarjen. Momenti i shoqërimit është fiksuar nga kolegët e Bicit, ndërkohë që efektivët dëgjohen të shprehen se gazetari po dërgohej në komisariat për verifikim.
Pasi është marrë në pyetje, Bici është lënë i lirë.
