Policia Kufitare ka bërë me dije se kufiri i Shqipërisë me Kosovën do të mbyllet për 14 ditë.
Ky lajm u bë publik pak minuta më parë përmes një postimi në faqen zyrtare në “Facebook” të Policisë së Shtetit, që informon se duke filluar nga ora 10:00 e ditës së sotme nuk lejohet më asnjë automjet e shtetas të hyjë në Kosovë e anasjelltas.
Lejim lëvizje do ketë vetëm për shtetasit Kosovarë që ndodhen në Shqipëri dhe duan të kthehen dhe e kundërta.
Po ashtu do kenë mundësi të kalojnë kufirin edhe ambulancat dhe makinat e lëvizjes së mallrave e ato qeveritare. Ky vendim erdhi pasi ditën e djeshme në Kosoavë u konfirmuan rastet e para me koronavirus, ndërsa në Shqipëri shifra e të prekurve vazhdon të rritet.
Njoftimi i Policisë Kufitare:
Policia Kufitare njofton të gjithë qytetarët se pikat e kalimit kufitar me Kosovën do të mbyllen për 14 ditë, për arsye të parandalimit të COVID-19.
Duke filluar prej orës 10:00 të datës 14.03.2020, nuk do lejohet asnjë automjet dhe asnjë shtetas të hyjnë në Kosovë dhe anasjelltas.
Do lejohen të hyjnë në Kosovë, shtetasit kosovarë që janë në Shqipëri dhe duan të kthehen në Kosovë, si dhe do lejohen të hyjnë në Shqipëri, shtetasit shqiptarë që janë në Kosovë dhe duan të kthehen në Shqipëri.
Do lejohen ambulancat, lëvizja e mallrave dhe makinave qeveritare.
Ky vendim i palës kosovare është marrë për të gjithë kufirin e Kosovës, jo vetëm për kufirin me Shqipërinë.
Policia Kufitare kërkon mirëkuptimin e qytetarëve që të anullojnë lëvizjet e planifikuara dhe ata që ndodhen duke lëvizur në drejtim të Morinës, të kthehen mbrapa, pasi nuk do lejohen të kalojnë./Fjala.al/
