Partia Demokratike përmes ish-deputetes, Jorida Tabaku i ka bërë thirrje qeverisë së kryeministrit Rama që të anulojë koncesionet që ua ka dhënë oligarkëve dhe t’i vendosë ato në funksion të përballimit të situatës së krijuar nga koronavirusi.
Tabaku thekson se Shqipëria ka nevojë për frymëmarrje në ekonomi dhe sipas saj, nisur nga kjo qeverisje, herët apo vonë shqiptarët do të përballen me një tjetër pandemi.
“Shqipëria ka nevojë për frymëmarrje në ekonomi!
Sot, çdo vend ka ndërmarrë masa drastike për t’iu përgjigjur krizës së Coronavirus. Çdo qeveri, ka miratuar paketa në mbështetje të ekonomisë dhe krizës që Coronavirus ka sjellë per biznesin. Ato, variojnë që nga ndihma direkte me fonde deri tek pezullimi i taksave. PD dhe aleatët kanë qenë konstruktivë duke propozuar masa konkrete që të ndihmojnë ekonominë.
Ekonomia jonë trashëgon një krizë të thellë në këto 7 vite si pasojë e politikave të gabuara fiskale dhe strukturore ekonomike. Konsumi në kushte normale ka qenë i ulët dhe është tejet e pritshme që situata e krijuar këto ditët e fundit dhe në javët në vijim do të prekë edhe më shumë këtë krizë të thellë që do trashëgohet.
Në një situatë të tillë, një qeveri e shëndoshë mendërisht mendon përtej ditës së sotme. Por kokëfortësia aktuale prodhon një dyfishim të krizës, pasi qeveria ende nuk ka ndërmarrë një vendim për të pezulluar pagesat e koncesioneve siç u propozua nga PD. Paratë e PPP-ve mund të përdoren fare mirë në rritjen e kapaciteteve për të testuar sa më shumë qytetarë dhe për të qenë më të pranishëm në këtë kohë krize”, shkruan Tabaku.
