Numri i rasteve të konfirmuara me koronavirusit në Holandë u rrit me 346 vetëm gjatë të mërkurës, duke shkuar në total në 2.051, me 58 të vdekur, sipas Institutit Kombëtar të Shëndetit. Por Ministri i Shëndetësisë, Bruno Bruins, u alivanos gjatë debatit në parlament mbi situatën e krijuar, një moment që u kap dhe nga kamerat.
Ndërsa Bruins u rrëzua përtokë, deputetët nxituan që t’i vijnë në ndihmë, por ministri e mori veten shpejt, piu pak ujë, dhe më pas u largua nga salla, pa pasur nevojë për ndonjë kontroll të mëtejshëm. Ministri 56-vjeçar, shpjegoi më vonë arsyen e humbjes së vetëdijes, duke thënë se kjo ndodhi për shkak të punës së tepërt pas disa javësh intensive.
“Tani jam më mirë. Sonte do të shkoj në shtëpi për të pushuar, që të mund të vazhdoj edhe nesër punën, për ta luftuar sa më shumë të jetë e mundur koronavirusin”-shkroi ai në Twitter. Gjatë fundjavës së shkuar, autoritetet holandeze urdhëruan mbylljen e të gjitha shkollave, bareve, restoranteve dhe klubeve deri më 6 prill, në një përpjekje për të ndaluar përhapjen e virusit. /S.T
