Nga Nikoleta Kovaçi
Detaje të reja zbardhen nga aksidenti tragjik i ndodhur mbrëmjen e kaluar në kryqëzimin e fshatit Borizanë, në Fushë-Krujë. Kanë qenë banorët e zonës që kanë bërëtë mundur edhe zbardhjen e emrave të viktimave, tre prej të cilëve janë edhe banorë të Malsisë së Krujës, ndonëse dy prej tyre, jetojnë ende në Cudhi Qendër, ndërsa tjetri është nga Larushku i Fushë-Krujës. Personi i katërt që ka qenë në mjet me krutanët është nga Berati dhe bëhet me dije se është mik i tyre dhe se ishte i punësuar në zonën e Fushë-Krujës ndaj edhe kishte njohje me djemtë.
Referuar të dhënave që vijnë nga Fushë-Kruja bëhet me dije se ende nuk dihet se çfarë ka ndodhur vërtet përveç asaj përplasjeje fatale mes mjetit në të cilin udhëtonin katër burrat dhe kamionit me targa Kosove. Banorë të Fushë-Krujës tregojnë se në familjet e tre të të ndjerëve krutanë është hapur morti, ndërkohë që trupi i pajetë i 45-vjeçarit nga Berati mësohet se do t`i kryhen nderimet në lagjen Çlirim. Sipas burimeve saktësohet se viktimat janë Nazmi Rrahmani, 36 vjeç, nga Cudhi Qendër, Flamur Visha, 33 vjeç, nga Larushku, Arben Koni (Kani) 36 vjeç, nga Kroi i Madh, Krujë, dhe Luljan Mahilaj 45 vjeç, nga Berati, baba i dy fëmijëve!
Dëshmitë nga vendi i ngjarjes tregojnë se në fakt policia ka mbërritur shumë vonë në vendin e ngjarjes. Ndihma e parë është tentuar t`u jepet nga kalimtarë të rastësishëm, ndërsa bëhet me dije se në momentin e përplasjes shoferi dhe pasaxheri i sediljes së parë kanë qenë të pajetë. Ndërkohë që personi që është sjellë me pak shenja jete, ka qenë personi që është gjendur në sediljen e pasme, pas pasaxherit të parë, por banorët nuk dinë të thonë se cili prej tyre ka qenë për shkak të masakrës që kishte ndodhur në mjet.
Po të njëjtat burime tregojnë se katër personat që humbën jetën kanë qenë duke u kthyer nga një drekë, ku kanë qëndruar për shumë orë me njëri-tjetrin dhe në atë moment kanë qenë duke shkuar në banesat e tyre. Ende nuk shpjegohet nëse bëhet fjalë për një gabim të drejtuesit apo mjeti nuk iu ka bindur në atë shpejtësi të çmendur që iu mori edhe jetën!
