Një i sëmurë nga koronavirusi ka rrëfyer historinë e tij teksa ka thënë se kur erdhi nga Gjermania për në Kosovë nuk ishte kontrolluar në aeroport. Por ai është dërguar në Klinikën Infektive për të bërë testin, ndërsa më pas e kanë dërguar në shtëpi.
Pacienti i cili ka preferuar të mos identifikohet ka theksuar se gjatë kësaj kohe ka pasur kontakte me shumë mjekë, kolegë dhe të tjerë duke mos ditur që bartte koronavirusin.
“Sot e kam marrë informator që kam dalë pozitiv. Të hënë kam qenë për të bërë testin për kooronavirus, por ata më kanë dërguar direkt në shtëpi. Kam qenë tërë kohën nëpër doktorë. Sot prapë më kanë pru në Infektiv dhe më ka dalë pozitiv”, është shprehur pacienti në një intervistë për Tv Klan Kosova.
“Po pasi kam shkuar në Infektiv herën e parë, më thanë se s’kam asgjë. Kam pasë kontakt me shumë me mjekë, kolegë gjatë kësaj kohe”.
Ai kishte ardhur nga Berlini me datën 11 dhe tha se në bord gjatë fluturimet ka pasur shumë njerëz.
“Në aeroport s’na kanë bërë asnjë kontroll. Kemi hyrë dhe dalë pa na kontrolluar”.
Lipjanasi tha se nuk ka pasë thuajse asnjë nga simptomat e përshkruar të koronavirusit, përveçse një lodhje të madhe të trupit.
“S’kam pasë simptoma asgjë hiç. Veç lodhje të madhe të trupit. S’kam pasë as dhimbje koke, as temperaturë, veç lodhjes që e kam pasë rregullisht”.
