Presidenti amerikan, Donald Trump është shprehur se bota po paguan një çmim të lartë me koronavirusit për shkak të ngadalësisë së Kinës në transmetimin e informacionit rreth koronavirusit.
“Gjithçka do të kishte shkuar shumë më mirë sikur ta dinim gjithë këtë disa muaj më parë. Gjithçka mund të ishte ndalur në Kinë nga ku filloi”, tha presidenti amerikan, duke përdorur përsëri termin mjaft të diskutueshëm “virus kinez”.
“Bota po paguan një çmim të rëndë për atë që kanë bërë”, shtoi ai në një konferencë për shtyp në Shtëpinë e Bardhë, shkruan CNBC.
Koronavirusi COVID-19 nisi fillimisht në muajin dhjetor në Ëuhan të Kinës ndërsa më pas u përhap edhe në vendet e tjera të botës. Fillimisht, autoritetet e Pekinit u kritikuan për mungesë transparence dhe ngadalësi ndaj përhapjes së virusit. Kina mori masa drastike dhe epidemia u ngadalësua ndjeshëm, por u përhap në të gjithë vendin.
“A duhet ta besojmë atë që po thonë tani? Shpresoj se është e vërtetë”, tha Trump. “Kush e di, shpresoj se është e vërtetë”, shtoi ai, duke aluduar në atë se numri i të infektuarve dhe të vdekurve në Kinë po bie.
