Një nga vendet më të prekura pas Italisë në Evropë, është edhe Spanja. Kjo e fundit po përjeton një ferr të vërtetë, ku të prekurit nga koronavirusi vdesin ditë pas dite.
Sipas të dhënave të Ministrisë së Shëndetësisë, ditën e sotme në Spanjë, vdekjet u rritën me 324 vetë, apo 32%, duke e çuar në total numrin e viktimave në 1,326.
Këto të dhëna vijnë ndërsa Spanja ka hyrë në javën e dytë të gjendjes së jashtëzakonshme që ka mbyllur shumicën e njerëzve në shtëpitë e tyre.
Madridi që është edhe epiqendra e shpërthimit në atë vend, ka njoftuar se do të përdorë hotelet si spitale të paracaktuara.
Qeveria spanjolle ka marrë masa duke përfshirë një paketë ndihme për industrinë e turizmit dhe transportit dhe po garanton deri në 100 miliardë euro kredi për të ndihmuar bankat të çlirojnë kredi për bizneset e vogla dhe të mesme.
Ndërkohë në media raportohet se për shkak të situatës shumë të rënduar, mjekët spanjollë kanë deklaruar se nuk u mbetet zgjidhje tjetër sesa të vendosin kë do të shpëtojnë.
Do t’u japin prioritet atyre që kanë më shumë mundësi për të jetuar.
“Pranimi i një hyrjeje do të thotë të mohojmë një person për një tjetër që ka më shumë mundësi të përfitojë, pra është e domosdoshme të evitojmë kriterin e hyrjes në bazë të mbërritjeve”, shkruhet në një dokument mbi emergjencën e Covid -19 të përgatitur nga grupi i punës së bioetikës të Shoqatës Spanjolle të Mjekësisë Intensive, Kritike dhe Unitetit Koronar (Semicyuc).
