Nga Nikoleta Kovaçi
Mbrëmë, orëve te vona, një shqetësim i madh ka ardhur nga Laçi. Banorë të zonës afër qendrës së Laçit janë revoltuar nga zhurmat e trajlerave që ngarkoheshin me skrap dhe lëviznin të qetë nëpër qytet drejt destinacionit të tyre të përcaktuar. Ata kanë treguar se në fakt kanë kërkuar edhe informacion mbi atë që po ndodhte në atë orë të vonë kur gjithë vendi ishte në shtetrrethim dhe se nuk kanë marrë asnjë përgjigje nga askush.
Referuar të dhënave që vijnë nga Laçi saktësohet se aty, pra te stacioni i fundit i hekurudhës, në Sanxhak, është pika e madhe e grumbullimit të skrapit. Ky skrap vjen me tren nga Mali i Zi dhe më pas ngarkohet me trajlera dhe niset për në pikën e Kurumit në Elbasan. Por, mbrëmë, në orën e vonë, krismat dhe zhurmat kanë vënë në lëvizje jo pak njerëz, qytetarë të Laçit të cilët kanë këkruar informacion nga Policia e tyre se çfarë po ndodhte në një kohë karantine të plotë për të gjithë e gjithçka.
Ata pretendojnë se nuk kanë marrë asnjë informacion dhe madje policia nuk ka marrë asnjë masë deri sa afër mesnatës është dhënë një urdhër për ndalimin e aktivitetit të transportit të skrapit drejt pikës së grumbullimit në Elbasan. Personat më të shqetësuar në fakt janë banorët e Sanxhakut dhe bizneset që kishin mbyllur aktivitetin e tyre që në orën 13.00 ndërkohë që afër tyre trajlera mbushën me skrap, kapërcejnë Tiranën e masave drastike për të kaluar në Elbasan.
Në kohën kur policia gjobit edhe këmbësorë që thyejnë fashat e orareve që ndryshojnë çdo ditë, kur asnjë mjet nuk lejohet pa patur autorizimin përkatës të lëviz gjatë kohës kur ka mundësi lëvizjeje, sepse që nga dje në drekë është urdhëruar për të moslëvizur askush, atëherë banorët e Sanxhakut me të drejtë shtrojnë pyetjen; pse duhet të punojnë ata kur ne kemi mbyllur aktivitetin e bukës për dy ditë?!
