Mjekja shqiptare, Lira Pelari, që punon në një prej spitaleve të Madridit i ka bërë thirrje autoriteteve shqiptare që të kryejnë masivisht teste. Në një lidhje me ‘News 24’, Pelari tha se testet masive kanë efekt te ato shtete kur rastet e infektimit me koronavirus vijojnë të jenë të pakta. Duke sjellë shembullin e Spanjës, mjekja u shpreh se shtetit iberik tashmë është vonë për t’i kryer këto teste, pasi të parët që do të mbylleshin në shtëpi do të ishin mjekët.
“Me shumë mundësi gjysma e mjekëve (në Spanjë) do të dilnin të infektuar dhe ne nuk e përballojmë dot që ata të shkojnë në shtëpi. Tani është vonë”, tha Pelari.
E pyetur për Shqipërinë ku zyrtarisht janë regjistruar vetëm 86 raste, mjekja tha se autoritetet e kanë hapësirën për të kryer sa më shumë teste, në mënyrë që edhe vendi ynë të mos përballet me një situatë të ngjashme si Spanja apo Italia.
