Kryeministri Edi Rama ka mbledhur përmes një video-konference kabinetin e tij qeveritar. Rama i është adresuar secilit ministër për përballimin e situatës ndaj koronavirusit, duke nisur që nga monitorimi i situatës nga policia dhe ushtria e deri tek ndihma që do t’u jepet familjeve në nevojë dhe biznesit të vogël.
Kryeministri Rama u ndal edhe tek çështja e faturave të energjisë elektrike. Sipas Ramës, qeveria tashmë i ka falur kamatëvonesat por energjia elektrike duhet të paguhet, pasi ndryshe sistemi energjetik bie në kolaps.
“Kush nuk paguan dritat, nuk do të ketë drita. Pagesa e dritave nuk negociohet. Kemi fshirë kamatëvonesat por të gjithë jemi me aktualitetin. Ata që duan të paguajnë më pak të kursejnë. Nuk mund të hyjmë në një situatë krize me sistemin e energjisë elektrike sepse biem në kolaps”, u shpreh Rama.
