Detaje të reja kanë në dritë lidhur me 20 të prekurit me koronavirus përgjatë 24 orëve të fundit në Shqipëri.
Qyteti i Durrësit është një nga qytetet e prekura nga koronavirusi ku 12 raste të tjera janë shtuar përgjatë 24 orëve të fundit.
Në këto raste mësohet se 11 persona që i përkasin të njëjtës familje. Ata kanë lidhje me 71-vjeçarin e identifikuar me koronavirus dy ditë më parë.
Mësohet se i moshuari në Durrës ka infektuar me COVID-19 11 familjarë të tij.
Zv/Ministrja e Shëndetësisë dhe Mbrojtjes Sociale, Mira Rakacolli u shpreh këtë të martë se mbrëmjen e djeshme dhe mëngjesin e sotëm kanë ndërruar jetë edhe 2 persona të tjerë duke e çuar kështu numrin total të viktimave në 13.
“Mbrëmjen e kaluar dhe mëngjesin e sotëm kanë ndërruar jetë në spitalin Infektiv një paciente 82-vjeçare nga Tirana dhe një pacient 62 vjeçar nga Durrësi, të konfirmuar me COVID-19, me sëmundje bashkëshoqëruese. Shkon në 13 numri i personave që kanë ndërrur jetë nga COVID-19 në Shqipëri. Ministria e Shëndetësisë dhe Mbrojtjes Sociale u shpreh ngushëllimet familjeve të të ndjerëve”, deklaroi zv/ministrja.
Deri më tani në Shqipëri janë testuar 1671 raste të dyshuara dhe prej tyre janë të konfirmuar pozitivë me COVID-19, 243 raste, ndërsa 13 persona kanë ndërruar jetë.
