Kryeministri Edi Rama ka folur sot në lidhje me situatën e krijuar në vend nga koronavirusi dhe për aktin normativ, që ka si qëllim të rregullojë raportet qiramarrës-qiradhënës.
Në një intervistë për ‘Opinion’, Rama tha se kjo është një kohë lufte ku gjithkush duhet të heqë diçka nga vetja, si dhe ka folur me tone të ashpëra për ata që nuk bien dakord.
“Shqiptarët janë njerëz solidarë, janë njerëz që kuptojnë dhe mirëkuptojnë. Një grusht nuk bën as shumicën dhe as karakterin e shqiptarëve. Patjetër mund të ketë një grusht. Pikërisht se janë këta njerëz ka dalë akti normativ. Le ta provojnë që të kacafyten. Kjo është një kohë lufte ku gjithkush duhet të heqë diçka nga vetja. Shumica dërrmuese e qiradhënësve duhet ta shohin këtë, jo vetëm nga njerëzillëku dhe solidariteti, por edhe në mënyrë pragmatike. Pse do ta nxjerrësh t’i një biznes që është sot i ndaluar të punojnë, kur t’i nuk ke mundësi të gjesh një biznes tjetër”,-u shpreh kreu i qeverisë.
Më tej ai theksoi edhe njëherë qëndrimin e tij se taksat, faturat e dritave dhe të ujit do të paguhen të gjitha.
“Heqje taksash, shtyrje takash, shtyrje faturash, të mos e përdorin në këtë luftë. Lufta financohet me taksa, nuk financohet nga ndonjë shpellë që ka flori, por financohet nga taksat. Kemi falur 150 milionë dollarë kamatëvonesa. Taksa, fatura detyrimesh për drita, janë jashtë bisedës”,-tha ndër të tjera Edi Rama./Fjala.al/
