Edhe pse bota po përballet me krizën globale të koronavirusit, aktivitetet financiare dhe fondet e organizatave për çështje të tjera po vijojnë normalisht. I tillë është edhe rasti i fondit prej 1.8 milion euro që është dhënë së fundmi për Shqipërinë dhe Tunizinë.
Bordi i Drejtorëve i ‘MedFund’ aprovoi fondet prej 1.8 milion € për Zonat e Mbrojtura Detare në Tunizi dhe Shqipëri për 5 vitet e ardhshme. Kjo mbështetje financiare, e dhënë për organizatat lokale të shoqërisë civile dhe agjencitë kombëtare përgjegjëse për zonat e mbrojtura, kontribuon në financimin e qëndrueshëm të menaxhimit efektiv të këtyre zonave natyrore.
Në Shqipëri do të përfitojnë zonat e mbrojtura në gadishullin e Karaburunit dhe ishullin e Sazanit.
MedFund përfiton nga mbështetja financiare e Qeverisë së Monakos, Fondacioni i Princit Albert II i Monakos, Global Environment Facility (GEF), French Facility for Global Environment (FFEM) dhe Agjencia Franceze e Zhvillimit.
