Deputetja Rudina Hajdari ka komentuar sot në Parlament punën e deritanishme të opozitës jo parlamentarë për situatën e koronavirusit.
Nga foltorja e Parlamentit, Hajdari deklaroi se sot opozita është në pikën e saj më të ulët dhe vakumin e krijuar nga ata po mundohet ta mbushë ajo vetë.
“Opozita sot është në nivelet më të dobëta, kur ka hapësirë për të bërë opozitë të fortë, unë po mundohem të mbush këtë vakum. Përfaqësimi im është për ata që nuk e ndiejnë veten të përfaqësuar nga kjo qeveri. Nëse ka njerëz që më përkrahin uroj të mos i zhgënjyer. Ne në parlament kemi bërë detyrën tonë. Unë kam detyrë t’u jap zë problemeve dhe shqetësimeve që më vijnë, duke folur në parlament dhe shpalosur shqetësimet që kam dhe jam e vetëdijshme sepse e kuptoj ca është të kesh një goditje të thellë ekonomike dhe të mos e përballosh dot jetesën” deklaroi sot Rudina Hajdari.
Për sa i përket çështjes së testimeve, Hajdari ka theksuar se Shqipëria po vepron në bazë të kapaciteteve, por gjithashtu nuk mund të fshihet fakti se numri total i testimeve është i ulët.
“Janë në një nivel goxha të ulët. Kemi kapacitetet që kemi, nuk mund ti baraspeshojmë me Gjermaninë, por ka pasur raste kur e kam kritikuar këtë gjë, por duke e marrë rast pas rasti dhe jo retorikë dhe sot prandaj fola për këtë çështje në parlament, prandaj i kërkova Ballukut, që ata që vijnë nga jashtë të testohen dhe nëse janë infektuar të karantinohen dhe jo të futen në një hotel dhe në një vatër tjetër infektimi. Nuk shikoj një lloj sistematike si argumentohen qëndrimet e qeverisë, pasi ka një boshllëk në vendimet e tyre” tha Hajdari.
