Lëvizja Vetëvendosje i është drejtuar Gjykatës Kushtetuese për t’i kërkuar opinion ligjor mbi vendimin e presidenti Hashim Thaçi për të dekretuar Avdullah Hotin si kryeministër të Kosovës.
Rexhep Selimi, kreu i Grupit Parlamentar të VV-së, iu drejtua Gjykatës pak minuta pasi Thaçi kishte bërë publik vendimin.
“Sapo dorëzuam kërkesën në Gjykatën Kushtetuese për vlerësimin e kushtetutshmërisë për dekretin e presidentit, këtë që e bëri në kohën e pandemisë. Me këtë dekret ne vlerësojmë që presidenti ka vazhduar të shkel Kushtetutën. Jo rastësisht në këtë kohë, ku po përfundon java e punës, kur e dimë që nesër është festë, presidenti është kujdesur që bashkë me bashkëpunëtorët e tij që po ja kërkojnë këtë që qoftë gjykatën Kushtetuese ose administratën, ta gjej të pushuar si pasojë e festës”, tha Selimi.
Lëvizja Vetëvendosje i mbetet qëndrimit se pas rrëzimit të qeverisë vendi duhet të shkojë në zgjedhje të parakohshme, por presidenti Thaçi thotë se deputetët e zgjedhur më 6 tetor kanë të drejtë të votojnë për një qeveri të re.
Avdullah Hoti vjen nga radhët e Lidhjes Demokratike dhe është propozuar për të qenë kryeministri në qeverinë e re që pritet të votohet në Kuvend. LDK ka arritur një koalicion me AAK, AKR dhe NISMA-n për të formuar qeverinë e re, pasi arriti të rrëzonte nga pushteti, me anë të një mocioni mosbesimi, Lëvizjen Vetëvendosje, ish-partner në koalicion.
Brenda 15 ditësh, Hoti duhet të prezantojë në Kuvend qeverinë e re, e cila duhet të votohet nga deputetët.
