Përqark globit, njerëzit janë në pritje të shpalljes se koronavirusi është vënë nën kontroll dhe se tashmë secili prej nesh mund ti rikthehet jetës normale.
Por qyteti kinez, qendra e përhapjes së virusit shkatërrimtar Po tregon se realiteti i ri është ende shumë larg. Kur zyrtarët e Wuhan njoftuan më 8 prill lehtësimin e masave shtrënguese, duke rikthyer transportin publik e duke i dhënë fund izolimit që zgjati për 78 ditë, banorët e kuptuan që rikthimi në normalitet nuk do të ishte aspak i lehtë, përkundrazi, pritej që rihapja do të ishte e dhimbshme.
Pavarësisht masave lehtësuese, ende sot, 3 javë më vonë, pjesa më e madhe e dyqaneve vijojnë të jenë të mbyllura, restorantet janë thuajse bosh dhe kur qytetarët dalin nga shtëpia, janë shumë strikt në respektimin e masave të sigurisë, duke mbajtur gjithë kohën doreza maska e duke ruajtur distancën nga njëri tjetri. Por presioni ende ndihet në qytet.
Më 8 prill teksa u shpallën masat e reja që hynë në fuqi, zyrtarët e shëndetit publik thanë se shumë sektorë janë kthyer 100% në punën dhe prodhimin e përditshëm. Më 25 prill, gjatë një mbledhje të qeverisë, zyrtarët theksuan sërish se vendi është gati të festojë për një fitore të dyfishtë, suksesin në luftën kundër koronavirusit dhe suksesin që edhe në këtë periudhë të vështirë, ekonomia shënoi rritje.
Por sipas vëzhgimit të bërë në qytet, shumica e pronarëve pranojnë se fitime në këto ditë janë zero dhe se do ti duhen muaj për të rimarrë veten e për të ringritur ekonominë familjare. Kryeqyteti i provincës Hubei është qyteti me fabrikat më të mëdha në të gjithe Kinën. Pavarësisht retorikës optimiste të qeverisë së Pekinit, Wuhani, qyteti që doli i pari nga shtetrrethimi, po tregon se rimëkëmbja do të kërkojë kohë.
Ekonomia e vendit ka shënuar rënie prej 40% të PBB-së për tremujorin e parë të këtij viti. Ndërkohë vendi ende i frikësohet një vale të dytë të koronavirusit me shtimin e rasteve të importuara nga jashtë./Fjala.al/Burimi: CNN
