Rusia ishte ndër të paktat shtete që dërgoi ndihma mjekësore dhe infermierë në Itali për ta ndihmuar në përballjen me pandeminë e koronavirusit. Por tani që situata po shkon drejt normalizimit, Moska po kërkon nga Roma që t’i përgjigjet po me një ndihmë të madhe.
Media italiane Linkiesta raporton se Vito Petrocelli, kryetar i Komisionit të Marrëdhënieve me Jashtë në Senatin Italian, ka marrë një letër nga homologu i tij rus, Leonid Slutsky, i cili i kërkon që Italia të ndikojë brenda Bashkimit Evropian për heqjen e sanksioneve ndaj Rusisë.
Duke përmendur ndihmën që shteti italian ka përfituar nga rusët jo vetëm gjatë pandemisë së koronavirusit, Slutsky kërkon nga Roma të bëjë presion mbi vendet e tjera anëtare që të heqin sanksionet e vendosura pas pushtimit të gadishullit të Krimesë.
“Vendet perëndimore që e quajnë veten demokratike, kanë vendosur disa tipe sanksionesh ndaj rreth një të tetës së popullatës së botës dhe nuk kanë në plan t’i zbusin ato as edhe gjatë pandemisë së koronavirusit. Unë i bëj thirrje të gjithë politikanëve të heqin dorë nga politika destruktive e sanksioneve,” shkruhet në letër.
BE dhe disa vende të tjera evropiane, përfshirë Shqipërinë, kanë vendosur sanksione ekonomike ndaj Rusisë pasi pushtoi Krimenë nga Ukraina.
