Ndryshe nga Monika Kryemadhi, partnerja kryesore në koalicionin opozitar, Lulzim Basha u shpreh i gatshëm të rikthehet menjëherë në tryezën e Këshillit Politik ku po diskutohet reforma e re zgjedhore.
Në një komunikim nga selia blu, Basha ndonëse akuzoi Qeverinë se i mungon vullneti për të pranuar propozimet e opozitës, tha se Partia Demokratike nuk është larguar kurrë nga tryeza.
“Janë gënjeshtra, nuk jemi larguar kurrë nga tryeza. Qeverisë i ka munguar vullneti për tu shprehur për propozimet. Kemi gati edhe propozime të tjera. Jemi gati që nesër të vijojmë diskutimet”, deklaroi Basha.
Opozita jashtëparlamentare ka bërë disa propozime ku përfshihet edhe kërkesa për qeveri tranzitore përpara zgjedhjeve parlamentare. Nga mazhoranca nuk ka një qëndrim zyrtar për këtë kërkesë.
Reforma Zgjedhore është një kusht kryesor i Bundestagut të Gjermanisë për të zyrtarizuar hapjen e negociatave të Shqipërisë me Bashkimin Evropian.
